من غير أسم ولا عنوان ..

أنا ضد إقحام الدين في السياسة .. يبقا أنا علماني صح ؟؟

بس أنا بصلّي وبصوم وهما بيقولوا إن كل مسلم سلفي ..

خلاص يبقى أنا سلفي .

بس أنا بشرب سجاير .. يبقى أنا مسلم عاصي ، بس أنا مع بقاء المادة التانية في الدستور القديم ..

خلاص يبقى أنا إخوانجي .

بس أنا مع الدولة المدنية .. خلاص يبقى أنا ليبرالي ، طب أزاي أبقي ليبرالي وأنا انتخبت حزب الوسَط ..

يبقى أنا أكيد مسلم معتدل .

بس فيه حاجة .. أنا بحب أغاني (الهافي ميتال) جداً .. وهما بيقولوا على اللي بيسمعها أنهم من عبدة الشيطان ، بس برضو أنا بحب اسمع القرآن بصوت (الطبلاوي) قوي  .

أنا أتعاطفت مع خطاب مبارك قبل موقعة الجمل .. يبقى أنا فلول طبعاً وِش ، بس أنا كنت في الميدان من أول يوم ..

يبقى أنا أكيد كده بقى من الثوار  .

أنا بطلّت أنزل الميدان من فترة .. يبقى أنا بقيت حزب كنبة صح ؟؟ .. لكن أنا أتصبت في( محمد محمود) ..

يبقى أنا بلطجي أو مُخرب زيَ ما بيقولوا .

أنا مع إسقاط مؤسسات الدولة الفاسدة .. يبقا أنا (أناركي) ، طب ينفع أبقى (أناركي) وأنا ماعرفش يعني إيه كلمة (أناركي) أصلا ؟!!!

خلاص .. الحاجة الوحيدة اللي أنا متأكد منها إني أتقتلت في الإستاد علشان كنت بقول في أول كل ماتش " يسقط يسقط حكم العسكر " ..

 يبقى أنا أكيد شهيد  ..

أخيرا عرفت أنا إيه .. أنا شهيد .

أيه ده ؟!! .. دول بيقولوا إن اللي مات في ماتش كورة مش شهيد ..

طب أنا اعمل إيه بقى ؟.. أنا مين ؟ حد يقولي أنا مين ؟ ..

خلاص .. مش مشكلة ومش عايز أعرف ومش مشكلة ما أبقاش شهيد  ..

خدوا مني أي صفة وأي لقب بس رجّعوني النهاردة علشان أقول لأمي كل سنة وأنتي طَيبة  ..

مينفعش ؟؟ .. طب قولولها يمكن أنا مش عارف أنا مين بس أنا عارف حاجة واحدة  ..

إن أنا ابن الست دي اللي لحد دلوقتي مستنياني أجي من الماتش .. ولحد دلوقتي بتسأل أبني فين  ..

وقولولها إني مش هقدر أقولها كل سنة وأنتي طيبة زَيّ كل سنة .

محمد العليمي