رسالة للرئيس من واحد إنتخب حمدين ..

السيد الدكتور (محمد مرسي) ..

ده خطاب موجه ليك بعدما عرفت إنك بقيت رئيس  خلاص ..

للعلم أنا لا انتخبتك في مرحلة أولى ولا تانية .. ولو الأيام رجعت بيا مش هنتخبك برضه ..

أنا إنتخبت (حمدين صباحي) .. ولو الإنتخبات إتعادت تاني برضه هنتخبه .

سامع واحد من مؤيديك بيشتمني .. مش هرد عليه على فكرة ..

ولا كأني سمعته وهقولها بأعلى صوتي تاني .. أنا فخور إني أنتخبت (حمدين) ومعتبره هو رئيسي .

سامعك بتقولي : طب عايز أيه بعد كل ده ..

سواء سيادتك وافقت على كلامي أو رفضت أنتا مسئول عن أنك تحقق طلباتنا طالما بقيت رئيس مصر ..

أه أنا مش راضي عنك ولا شايفك تصلح وهبقى من أشد المعارضين ليك ..

 بس الواقع بيقول أني لازم أرضى بالأمر .. وأقبل بكونك بقيت الرئيس ..

طلباتي بسيطة .. إنك تثبتلي العكس ..

إثبتلي إنك تصلح .. إثبتلي أنك هتعمل على الأقل نص المطلوب منك ..

صلّح غلطات حزبك اللي كرّهتنا في كل اللي ليه صلة بيكم ..

ما تبقّيش مصلحة جماعتك على مصلحتنا ..

كفاية سنة ونص ضيعتوها فكلام فاضي ووقفكم في صف المجلس العسكري وحججكم وتبريراتكم عن الصلاحيات والحكومة اللي مش مسعداكم ..

متنساش حقوق شهداء الثورة والشهداء اللي دمهم في رقبة المجلس العسكري ..

مش عايز فتن تحصل تاني بينا .. مش عايز أخويا المسيحي يحس أنه مضطهد في بلده ..

عايز عدل فكل حاجة ..

إفتكر الكلمة دي دايماً .. العدل ..

قدامك فرصة أنك تدخل التاريخ لو حققت اللي إحنا عايزينه .. أو تخرج بره التاريخ لو قصّرت في تنفيذ اللي إحنا عايزينه ..

والسلام ختام ..